Bekroonde skrywer Eben Venter, het lede van die Strand-biblioteek Boekklub trakteer met ’n onlangse besoek om te praat oor sy nuwe boek, Decima.
In toevoeging tot die heerlike interaksie met Eben het hy ook gaste bederf met ’n vermaaklike voorlesing wat luisteraars in vervoering meegevoer na die lewe van Decima, die swartrenoster wat in die boek voorkom.
Die geleentheid het op Dinsdag 10 Oktober by die Strand-biblioteek plaasgevind.
Eben het die praatjie afgeskop deur meer oor die ontwerp van die boek omslag en die storie agter die prentjie van die Indiese renoster te deel, uit te brei oor al die navorsing wat hy moes doen, sy ervaring tydens ’n besoek aan ’n renosterweesplaas, Care for Wild, die verskeie vertellers in die boek asook hoekom hy juis oor ’n swartrenoster geskryf het.
Hy het met die gehoor ’n emosiebelaaide oomblik gedeel oor toe hy met ’n tietiebottel ’n wees renoster kalfie moes voer, hoe diep dit hom geraak het en hoe dit tot die skryf van die boek bygedra het.
Maar hy benadruk sterk dat die boek nie ’n boek is wat handel oor renosterstropery nie en hy nie wil he dat mense dit so moet sien nie. “Stropery is nie die primêre onderwerp van die boek nie, maar dit is ’n deel van die boek.
“Dit is belangrik dat die boek nie bekend staan as ’n boek oor stropery nie, maar dat stropery slegs ’n element van die boek is.”
“Die boek bevat ’n volledige mengsel van verskillende stemme. “Ek het die mense met respek en met kennis probeer uitbeeld en daar is karakters in die boek wat die diere respekteer en daar is ander wat die diere wil gebruik vir hul eie doeleindes (gierigheid) en ’n totale onbegrip hê vir wat hierdie diere beteken in hulle omgewing; en mense wat gewoon net niks omgee vir die voortbestaan van die swartrenoster, so dit is alle eienskappe van mense wat na vore kom as jy die boek lees.”
Onderhoudvoerder vir die gesprek was Karen Ellis, van die Somerset-Wes biblioteek. Sy het hom veral gepols (tot groot vermaak van die gehoor) om te onderskei tussen werklikheid en fiksie in die inhoud van die boek. “As jy ’n skrywer is van fiksie, soos hulle sê, ‘You lie the truth’,” het Eben speels hierop geantwoord. Hy beskryf die boek as outo-fiksie.
“Baie dele van die boek is gebaseer op ervarings wat ek self meegemaak het en groot dele van die boek is gebaseer op diep navorsing maar wat wel vir my belangrik is hoe julle as lesers die boek ervaar.”
Boekklub lede is onder andere ook meer konteks gebied oor terme, plekke, gemeenskappe, plekke en storielyne in die boek, insette wat hulle attent na geluister het.
Eben het ook melding gemaak van hoe hy die sterfte van sy ma in die storie saamgeweef het en hoe die boek op die ou einde die storie van twee moeders bevat, die van sy eie asook Decima as renoster-ma. “Die stories vul mekaar aan- dink ek,” het hy bygevoeg.
Verder het hy ander interessante feite met die gehoor gedeel onder andere hoe hy ’n versamelnaam vir ’n trop renosters ‘gecoin’ het deur na hulle as “’n storm renosters” te verwys, die inhoud van renoster horing en hoe dit geensins medisinale waarde het nie.
Hy het meer lig gewerp op die oorsprong van die mite deur Chinese medisynemans dat renoster horing medisinale waarde het en hoe die siening vanaf ’n antieke gids afkomstig is.
“As jy vir hulle vra wat is die aktiewe bestandeel van die horing waarin julle glo, hulle kan dit nie uitwys nie, maar hulle wil nie maklik afstand doen van hul geloof in hierdie antieke gids nie.”
Die gehoor is geleentheid gegun om vrae aan die skrywer te rig. Een van die vrae is deur Strand Serenitas inwoner, Gert Bezuidenhout gevra oor die boek se eenwoord titel, nóg ’n vraag deur Ivy Matthee van die Strand het gehandel oor hoekom Eben juis die swart renoster gekies het om oor te skryf.
“Ek het dit gekies omdat dit die mees bedreigde renosterspesie is en die een wat die Chinese medisynemanne op hul ‘shopping list’ verkies, die wilde swart renosters.”
Johan Nel, van Somerset-Wes was beindruk met die geleentheid. “Hy het goed gepraat. “Ek maak ’n punt daarvan om renosters te besoek in ’n wildpark en vir my is die kwessie van stropery erg.”
Eben, wat tans in Australië woon, het aan Bolander oor hierdie tipe plaaslike geleenthede gesê: “Dis vir my lekker om met my lesers kennis te maak en ek dink as jy vir mense vertel hoe jy die storie geskryf het en van die aspekte van die storie wat jy nie heeltemal verklap nie—jy hou so bietjie daarvan geheim—dan prikkel dit mense se belangstelling en hulle koop ’n paar boeke. So dit is baie belangrik om daai kontak te hê met die lesers.”
Ten slotte wil hy hê Decima moet my mense die besef tuisbring dat renosters ’n gevoelvolle wese is, dat dit ’n sentient being is. “Dis nie sommer net ’n dier wat daar staan wat jy kan doodskiet nie. Daai dier het ’n geskiedienis, sy het ’n geheue (sy onthou goed van haar ouma), sy het iets om mee te deel aan haar kinders.
Na afloop van die praatjie het Eben kopieë van die boek vir kopers onderteken.
